வீட்டுத் தோட்டம் - சொட்டு நீர் பாசனம் (Drip Kit)

Welcome to ‘தோட்டம்’ 

நண்பர்களுக்கு வணக்கம். போன பதிவில் கூறியபடி, சில கோவை நண்பர்கள் தோட்டத்தை பார்க்க தங்கள் ஆவலை தெரிவித்து இருந்தார்கள். செப்டம்பர் 13-ஆம் தேதி ஞாயிற்றுகிழமை ஓரளவு விளைச்சளோடு தோட்டம் பார்க்க சரியாக என்று இருக்கும் என்று நினைக்கிறேன். செப்டம்பர் 13-ஆம் தேதி, ஞாயிறு காலை பத்து மணி முதல் ஒரு மணி வரை விருப்பம் இருக்கும் நண்பர்கள் வரலாம். உங்கள் வரவை thooddamsiva@gmail.com க்கு உங்கள் மொபைல் எண்ணோடு ஒரு மடல் அனுப்பி உறுதி செய்து கொள்ளுங்கள். தோட்டத்திற்கு வழியை உங்கள் மடலுக்கு பதிலாக அனுப்புகிறேன்.

 
வரும் நண்பர்கள், உங்கள் எதிர்பார்ப்பை கொஞ்சம் குறைவாகவே வைத்து வாருங்கள் (இல்லன்னா ஷங்கர் படம் மாதிரி புஸ்ஸுன்னு போயிரும்). இங்கே பெரிய Shade Net எல்லாம் கட்டி, பெரிய பெரிய பாத்திகளில் ஒரு முப்பது கத்தரி, முப்பது மிளகாய் செடி என்று எல்லாம் காண முடியாது. மூன்று பேர் கொண்ட குடும்பத்துக்கு என்ன தேவையோ அவ்வளவு குறைவான செடிகளே இருக்கும். ஆனாலும் உங்கள் எதிர்பார்ப்பை பூர்த்தி செய்யும் அளவில் எல்லா செடிகளையும் பார்க்காலாம் :-)


வீட்டுத் தோட்டம் – சொட்டு நீர் பாசனம்

மாடித் தோட்டத்திற்கு சிலர் சொட்டு நீர் பாசனம் (Drip irrigation) அமைக்கிறார்கள். நான் ebay தளத்தில் சில Drip irrigation செட் பார்த்திர்க்கிறேன். 50 செடிகள், 100 நூறு செடிகள் என்று ஒரு செட்டாக கிடைக்கிறது. போன மாதம் அக்ரி இன்டெக்ஸ்-ல் KSNM Drip irrigation செட் ஓன்று பார்த்து வாங்கி வந்ததை சொல்லி இருந்தேன். 50 Sq.Meter, 100 Sq.Meter என்று செட் வைத்திருந்ததை பார்த்து சந்தேகம் வந்தாலும், “For Kitchen Garden” என்று போட்டிருந்ததால், வாங்கி தான் பார்க்கலாமே என்று வாங்கி வந்தேன். வந்து பார்த்த போது சில பொருட்கள் இல்லாமல் இருந்தாலும், KSNM கம்பெனியில் இருந்து அழைத்து தவறு நடந்து விட்டதாக கூறி இரண்டு வாரத்தில் இன்னொரு செட் இலவசமாகவே அனுப்பி வைத்திருந்தார்கள். அதோடு விளக்க சி.டி ஒன்றும் கூட அனுப்பி வைத்திருந்தார்கள். 

விளக்க சி.டி பார்த்த போது தான் இது விவசாயிகள் பயன்படுத்தும் சொட்டு நீர் பாசனத்தின் மினியேச்சர் செட் என்று. அதாவது 50 Sq. Meter அளவுக்கு இடம் இருந்தால் அதில் ஒரு மீட்டர் இடைவெளியில் பத்து மீட்டர் நீளத்திற்கு ஐந்து Drip Tape அமைத்து, அந்த Drip Tape-ல் அரை மீட்டருக்கு ஒரு துளை அமைத்து சொட்டு நீர் பாசனம் செய்வது. 50 Sq. Meter-ல் மொத்தம் ஐம்பது செடி நடுவது மாதிரி ஒரு அமைப்பு. கீழே உள்ள படத்தை பார்த்தால் புரியும்.  (Images from KSNM demo CD)

இதில் கொடுக்கப்பட்டுள்ள 50 Sq. Meter என்பது கிட்டதட்ட 500 சதுர அடி இடம். அடிக்கு ஒரு செடி வைத்தாலும் நான் 500 செடி வைத்து கொள்வேன் :-) . ஒரு பெரிய தோட்டமே போட்டு விடலாம். தவிர இப்படி லட்டு மாதிரி 50 Sq. Meter-ல் சதுரமாய் இடம் எல்லாம் என்னிடம் இல்லை. 

500 ரூபாய் (Agri Index Rate Rs.450) கொடுத்து வாங்கியாகி விட்டது, இதை எதாவது உருப்படியாய் மாற்றலாம் என்று யோசித்தபோது தான் ஒரு ஐடியா வந்தது. இதை லேசாய் மாற்றி சுற்றி இருக்கும் மரங்களுக்கு நீர் பாய்க்க பயன்படுத்தினால் என்று தோன்றியது. மரங்களுக்கு சொட்டு நீர்  பாசனம் எல்லாம் வேலைக்காகாது. அதனால் Drip Trap-ல் இருக்கும் துளைகளை எல்லாம் (45 cm spacing) ஒரு insulation Tape வைத்து அடைத்து விட்டு,  T-Connector-ஐ வைத்து ஒவ்வொரு மரத்துக்கும் நேரடியாக பைப் மாதிரி செட் செய்து விட்டேன். என்னிடம் இரண்டு செட் இருந்ததால் மொத்தம் பத்து T-Connector வைத்து பத்து மரங்களுக்கு ஒரே நேரத்தில் நீர் பாய்வது மாதிரி செய்து விட்டேன்.

Drip Tape வைத்து அமைக்கும் போது முடிந்த அளவுக்கு நிலம் ஒரே மட்டத்தில் இருக்குமாறு பார்த்துக் கொள்ள வேண்டும். தவிர, Drip Tape எங்கும் மடங்காதவாறு அமைக்க வேண்டும். நாம் Drip Tape-ஐ நேர் கோட்டில் இருந்து மறு திசைக்கு திருப்ப வேண்டிய இருந்தால், ஒரு T-Connector-ம் ஒரு End Cap-ம் வைத்து திருப்பி விடலாம் ( L – Connector ஏதும் இருக்கிறதா என்று தெரியவில்லை. இருந்தால் பயனுள்ளதாக இருக்கும் )

இந்த பத்து மரங்களுக்கும் இதே அமைப்பை PVC பைப் கொண்டு அமைப்பது என்றால் செலவும் அதிகமாகும், வேலையும் அதிகம். இந்த Drip Kit அமைக்க மிக எளிதாக இருக்கிறது. சும்மா தேவையான நீளத்திக்கு Drip Tape வைத்து T-Connector வைத்து  கோர்த்துக் கொண்டே போக வேண்டியது தான்.   

இதை அமைத்தப் பிறகு தண்ணீரை திறந்து விட்டுவிட்டு வேறு வேலைகளை பார்க்க முடிகிறது. அனால் வழக்கத்தை விட நிறைய தண்ணீர் செலவான மாதிரி ஒரு உணர்வு. சின்ன பைப்பில் இருந்து நீர் மெதுவாக விழுவதால் நீர் பரவாமல் ஒரே இடத்திலேயே உறிஞ்சப்பட்டு விடுகிறது. மொத்தமாய் பாத்தி முழுவதும் ஈரமாக நிறைய நீர் செலவாவது போல தெரிகிறது. இன்னும் சில முறை பார்த்துவிட்டு முடிந்தால் எல்லா மரங்களுக்கும் இதே போல செட் செய்து விட்டால் நிறைய நேரம் மிச்சமாகும். தரையில் வைக்கும் செடிகளுக்கு கூட இதை போல ஒரு அமைப்பை செய்தால் பயன்படலாம்.

KSNM Drip Kit தரத்தை பற்றி கூற வேண்டும் என்றால், T-Connector, End Cap எல்லாவற்றின் தரமும் மிக நன்றாக இருக்கிறது. T-Connector-ல் உள்ள Lock & Valve மிக உறுதியாக இருக்கிறது.  துளையே இல்லாமல் Drip Tape கிடைத்தால் நம் விருப்பபடி பாசனத்தை  அமைக்க ஏதுவாக இருக்கும். T-Connector ஒவ்வொன்றும் தனியாக என்ன விலை சொல்கிறார்கள் என்று தெரியவில்லை. கோவையில் அவர்கள் கம்பெனி போய் விசாரித்து, தோட்டத்தில் இந்த பாசன திட்டத்தை விரிவு படுத்தினால் கூறுகிறேன். 

T-Connector

End Caps

Drip Tape

T-Connector with Drip Tape

End Cap with Drip Tape

set-up to connect to main hose

Drip Kit - Full set

மற்றபடி, மாடித் தோட்டத்திற்கு சொட்டு நீர் பாசனம் அவசியமா என்றால், எனக்கு பெரிதாய் அதில் உடன்பாடு இல்லை. ஒரு Mug தண்ணீர் எடுத்து, நம் உள்ளங்கை நனைய செடிகளுக்கு ஊற்றி விடும் போது ஒரு சந்தோசம் இருக்கத் தான் செய்கிறது. கொஞ்சம் நேரம் ஆகும். ஆனால் எனக்கு கிடைக்கும் நல்ல விளைச்சலுக்கு அதுவும் ஒரு காரணமாக எனக்கு தோன்றும். இருந்தாலும், ஊருக்கு போகும் போது செடிகளை எப்படி பார்த்துக் கொள்வது என்ற கேள்வி இருக்கத் தான் செய்கிறது. Timer வைத்து, சொட்டு நீர் பாசனம் எல்லாம் அமைக்க வழி இருக்கிறது. கொஞ்சம் செலவு ஆகும். ஊருக்கு போகும் ஒரு வாரம் மட்டும் சமாளிக்க இது பயன்படலாம். அப்படி ஏதும் அமைத்தால் பிறகு கூறுகிறேன்.

ஜூன்-டிசம்பர் சீசன் – Updates

இந்த சீசனின் அறுவடையை ஆரம்பித்தாகி விட்டது. வெண்டை, செடி அவரை, கத்தரியில் காய் பறிக்க ஆரம்பித்து விட்டோம். தக்காளி, மிளகாய் எல்ல்லாம் இன்னும் கொஞ்சம் பிஞ்சாக இருக்கிறது.

 
கத்தரியில் நான்கு வகை. அத்தனையும் நாட்டு வகை என்பது இந்த சீசனின் சிறப்பு. சில படங்கள் கீழே. அடுத்த பதிவில் விவரமாய் கூறுகிறேன்.

2015- சீசன்-2 (ஜூலை-டிசம்பர்) – Part – 2 (பூ மற்றும் பிஞ்சி)

ஜூன் மாதத்தில் தொடங்கிய இந்த சீசன் செடிகளின் தற்போதைய நிலவரத்தை பார்க்கலாம். நிறைய பேர் இந்த ஆடி பதினெட்டில் (ஆடிப்பெருக்கு) விதைத்து இந்த சீசனை ஆரம்பித்து இருப்பீர்கள். நான் பொதுவாக மே மாதத்திலேயே ஆரம்பித்து விடுவேன். ஆடிக்கு காத்திருப்பதில்லை.

செடிகள் எல்லாம் இப்பொது பூத்து பிஞ்சி பிடிக்க ஆரம்பித்து இருக்கின்றன. தோட்டத்தின் தற்போதைய நிலவரம்,

வெண்டை, அவரை செடிகளில் இன்னும் ஒரு வாரத்தில் காய் பறிக்கலாம். இன்னும் ஒரு மாதத்தில் கத்தரி, தக்காளி, மிளகாய் செடிகளில் காய் பறிக்க ஆரம்பிக்கலாம்.

தக்காளியில் மூன்று வகை (நண்பர் பரமேசிடம் வாங்கிய மஞ்சள், நாட்டு தக்காளி மற்றும் பழைய ஹைப்ரிட் US Seeds (DIY Kit-ல் கொடுத்தது. இதில் மஞ்சள் தக்காளி கலக்கலாய் வந்திருக்கிறது. செடியை பார்த்தாலே அவ்ளோ செழிப்பாக இருக்கிறது. தொடக்கத்தில் நாட்டு தக்காளி செடிகள் கொஞ்சம் சுமாராக தான் தெரிந்தது. இப்போது கொஞ்சம் செழிப்பாக தெரிகிறது. ஹைப்ரிட் செடி ரொம்பவே சுமார். எதிர்பார்த்தது தான். ஹைப்ரிட் விதைகள் காலாவதி ஆகி விட்டது. இருந்தாலும் போட்டு விட்டேன். மிச்சம் இருப்பதை தூர போட்டு விட வேண்டும்.

கத்தரியில் மூன்று வகை. நண்பர் பரமேசிடம் வாங்கிய பச்சை கத்தரி, ஓடவை ஊதா கத்தரி மற்றும் நான் வருடா வருடம் விதை எடுத்து பயன்படுத்தும் வெள்ளை கத்தரி. மூன்றுமே பட்டையை கிளப்புகிறது. செடிகளை பார்த்தாலே அவ்ளோ செழிப்பு. அவ்ளோ பெரிய இலைகள். பொதுவாக ஒரு செடியின் ஆரோக்கியத்தையும், விளைச்சலையும் நான்கு இலைகள் வரும் போதே சொல்லி விடலாம். இந்த கத்தரி செடிகளின் இலைகள் ஒரு வாழை இலை போல அவ்ளோ பெரிய, திரட்சியான இலைகள். விளைச்சல் கண்டிப்பாக நன்றாக இருக்கும். அதை தான் ‘விளையும் பயிர் முளையிலேயே தெரியும்’ என்றார்கள். சுமாரான விதையை போட்டுவிட்டு நாம் என்ன தான் உரமாக அள்ளிப் போட்டு குட்டிக்கரணம் போட்டாலும் விளைச்சல் எடுக்க முடியாது.

மிளகாயில் மூன்று வகை. நண்பர் பரமேசிடம் வாங்கிய சீனி மிளகாய், சம்பா மிளகாய் மற்றும் DIY Kit-ல் வந்த பழைய ஹைப்ரிட் US Seeds. நாட்டு வகை இரண்டும் நன்றாக வந்திருக்கிறது. காலாவதியான ஹைப்ரிட் விதை சுமார் தான். கொஞ்சமாவது காய்க்கும் என்று நினைக்கிறேன்.  

இந்த சீசனின் முதல் பதிவில் சொன்ன மாதிரி, வந்த ஒரே ஒரு கண்டங்கத்தரி, தூதுவளை செடிகளை வெற்றிகரமாக தேற்றி இப்போது பெரிய பைகளில் வைத்திருக்கிறேன். பிறகு தான் அவைகளுக்கு ஒரு இடம் ஒதுக்க வேண்டும். 

மாடியில் குடைமிளகாய் இப்போது தான் மொட்டு வைத்திருக்கிறது. 

கிடைத்த கொஞ்ச இடைவெளியில் மாடியில் வைத்த முலாம் பழம் இரண்டு பிஞ்சி பிடித்திருக்கிறது. சீக்கிரம் ‘என் வீட்டுத் தோட்டத்தில்’ முலாம் பழம் இடம் பெறலாம். பார்க்கலாம்.

பேபி கார்னும், ஸ்வீட் கார்னும் செழிப்பாக வளர்ந்து நிற்கிறது. இன்னும் கதிர் பிடிக்கவில்லை.

வழக்கமான பிரச்சனை கொடிகள் தான். செடி என்று வைத்த கொடி அவரை செழிப்பாக சுற்று சுவற்றில் படர்ந்து போய்க் கொண்டிருக்கிறது. சீக்கிரம் மொட்டு வைக்கும் என்று நினைக்கிறேன். ஆனால் முக்கியமாய் எதிர்பார்த்த புடலை பூவாய் பூத்து தள்ளுகிறது. ஆனால் பிஞ்சி ஏதும் பிடிக்க மாட்டேன்கிறது. உரம், மண் எல்லாம் நன்றாக தான் இருக்கிறது. போட்ட விதை சரி இல்லை என்று நினைக்கிறேன். இன்னும் ஒரு மாதம் பார்த்துவிட்டு பிடுங்கி போட்டுவிட்டு புதிதாய் தான் போட வேண்டும். மிதி பாகல் காய்க்க ஆரம்பித்து இருக்கிறது. ஆனால் பெரிதாய் விளைச்சல் கிடைக்காது என்று நினைக்கிறேன் (ஐந்து செடிகள் நிற்கிறது). பெரிய பாகல் ஓன்று இனி தான் விதைக்க வேண்டும். 

வெள்ளரி கொடியில் பிஞ்சி தெரிகிறது. காய் பறிக்கும் அளவுக்கு வருகிறதா என்று பொறுத்திருந்து தான் பார்க்க வேண்டும். சுரைக்காய் மெதுவாய் தான் வந்து கொண்டிருக்கிறது. இன்னும் பந்தலை எட்டிப் பிடிக்கவில்லை. மொத்தத்தில் வழக்கம் போல கொடிகளில் சொதப்பல் இந்த சீசனிலும் தொடர்கிறது.

முட்டைக்கோஸ் தொட்டியில் வைத்ததும், தரையில் வைத்ததும் நன்றாக வந்துகொண்டிருக்கிறது. கோஸ் வந்தால் தான் விளைச்சலை பற்றி கூற முடியும்.

 

வெங்காயம் கொஞ்சம் சொதப்பல் தான். போன முறை விளைச்சல் எடுத்த Omaxe விதை மீதம் இருந்ததில் ஓன்று கூட முளைக்கவில்லை. விதை காலாவதி ஆகவில்லை. ஒரு வேலை சரியாக திறந்த பாக்கெட் விதைகளை பாதுக்காக்கவில்லை என்று நினைக்கிறேன். அந்த விதை பாக்கெட் கூட திறக்காமலேயே வைத்திருந்த இன்னொரு வகை பெரிய வெங்காயம் கூட ரொம்ப குறைவாகவே முளைத்தது (ஒரு அறுபது விதைகளில் பதினைந்து தான் முளைத்தது – 25% germination rate தான்). இந்த விதையும் காலாவதி ஆகவில்லை. ஆனாலும் சரியாக முளைக்கவில்லை.

இந்த முறை அக்ரி இன்டெக்ஸ்-ல் TNAU-ல் வாங்கிய சின்ன வெங்காயம் நன்றாக முளைத்திருக்கிறது. இனி தான் எடுத்து நட வேண்டும். இன்னும் இந்த அக்ரி இன்டெக்ஸ்-ல் வாங்கிய ஒரு பாக்கெட் வெள்ளை பெரிய வெங்காயமும், சிவப்பு பெரிய வெங்காயமும் விதை இருக்கிறது. இந்த வாரம் நடலாம் என்று இருக்கிறேன்.  

இந்த சீசனில் பூச்சி தாக்குதல் என்று பார்த்தால், அசுவினி பூச்சிகள் அவரை செடி  விதையில் இருந்து வெளியே எட்டிப் பார்பதற்கும் வந்து உட்கார்ந்து கொள்கின்றன. வழக்கம் போல கோலா பானம் தான் நமக்கு கை கொடுக்கிறது. இரண்டு முறை பூச்சிகள் வந்தது. கோலா தெளித்து விட்ட பிறகு எந்த பிரச்னையும் இல்லை. இந்த International பிராண்ட்டுகளில் கருப்பு கோலாவுக்கு மட்டும் தான் இந்த மகத்துவம் இருக்கிறதா இல்லை ஆரஞ்சு கலர், ஆப்பிள் கலர் என்று மற்ற வகைகளிலும் இந்த மகத்துவம் இருக்கிறதா என்று ஒரு சின்ன ஆராய்ச்சி செய்யலாம் என்று இருக்கிறேன் :) .

வெண்டையில் வெள்ளை சாறுரிஞ்சும் பூச்சிகள் ஒரே ஊரு செடியில் வர ஆம்பித்தது. எல்லாவற்றையும் கையால் நீக்கி விட்ட பிறகு இப்போது பிரச்னை இல்லை. ஆனாலும் வெண்டையை தினமும் கவனித்து வருவது அவசியம். செடிகளின் மீது ஏதும் எறும்பு நடமாட்டம் இருந்தால் உடனே கவனிக்க வேண்டும்.

முலாம் பழத்தில் இலைப்பேன் தாக்குதல் நிறையவே வந்து விட்டது. அதனாலேயே செடி கொஞ்சம் திணற ஆரம்பித்து விட்டது. நீரில் வேப்பம் புண்ணாக்கு கலந்து தெளித்து ஓரளவுக்கு கட்டுப்பாட்டுக்குள் வந்திருக்கிறது. இலைகளின் அடியில் தான் பூச்சிகள் இருப்பதால் கட்டுப்படுத்துவது கொஞ்சம் சிரமமாக இருக்கிறது. கொஞ்சம் பொறுமையாக ஒவ்வொரு இலையாக திருப்பி வைத்து வேப்பம் புண்ணாக்கு நீரை தெளிக்க வேண்டிய இருக்கிறது. எப்படியும் கட்டுக்குள் கொண்டு வந்து அறுவடை எடுத்து விடலாம்.

கோவை நண்பர்கள் சிலர் தோட்டம் பார்க்க வரலாமா என்று சீசனின் தொடக்கத்தில் கேட்டு இருந்தார்கள். நான் அவர்களிடம் விளைச்சல் ஆரம்பித்தவுடன் பார்த்தால் நன்றாக இருக்கும் என்று கூறி இருந்தேன். முடிந்தால் செப்டம்பர் மாதம் ஒரு ஞாயிறு காலை ஒரு விசிட் வைத்துக் கொள்ளலாம். கோவை நண்பர்களின் சந்திப்பாக வைத்துக் கொள்ளலாம்.

புதிய தலைமுறை மற்றும் அக்ரி இன்டெக்ஸ் 2015

புதிய தலைமுறை இதழில் நான்

போன வாரம் புதிய தலைமுறை இதழில் ‘பசுமைப் பக்கங்கள்’ என்ற தலைப்பில் எனது கட்டுரை வந்துள்ளது (அந்த கட்டுரையில் எனது பங்கு மிக குறைவு தான். தருமபுரி வேளாண் உதவி இயக்குனர் திரு.மதுபாலன் அவர்களின் கட்டுரை என்று தான் சொல்லவேண்டும்). எனக்கு இந்த வாய்ப்பு அளித்த புதிய தலைமுறை குழுவுக்கும், சின்னதுரை அவர்களுக்கும் எனது நன்றி.  

அமைந்தால் எல்லாமும் நன்றாக மொத்தமாய் அமையும் போல. போன வாரம் விகடன். இந்த வாரம் புதிய தலைமுறை என்று எனக்கு ஒரு சிறிய அடையாளம் கிடைத்திருப்பது குறித்து சந்தோசம்.நிச்சமாக இந்த இரண்டு கட்டுரைகளும் தோட்டம் சம்மந்தமாக சிலரை அணுக எனக்கு உதவும் என்று நினைக்கிறேன். 

அக்ரி இன்டெக்ஸ் 2015

இந்த வருட அக்ரி இன்டெக்ஸ் நிறைவாக முடிந்தது. ஞாயிறு காலை குடும்பத்தோடு கட்டுச்சோறு கட்டிக்கொண்டு கிளம்பி விட்டோம். போன வருடம் அளவுக்கு அடிதடி எல்லாம் இல்லை. நல்ல கூட்டம் தான். ஆனாலும் ஸ்டால்களை எல்லாம் பொறுமையாக பார்க்க முடிந்தது. ப்ளாக் நண்பர்கள் சிலரை சந்திக்க முடிந்தது. நண்பர் தாமஸ் ரூபனை நேரில் சந்திக்க முடிந்தது. எனக்கான ஒரு பெரிய பை நிறைய அவர் தோட்டத்தில் இருந்து அவரை, பீன்ஸ், மஞ்சள்,எலுமிச்சை என்று ஒரு பெரிய காய்கறி கூடையையே விதைக்காக கொண்டு வந்திருந்தார். ரொம்ப சந்தோசமாய் இருந்தது. 

அடுத்த அக்ரி இன்டெக்ஸ் போது முடிந்தால் நாம் ப்ளாக் நண்பர்கள் எல்லாம் சந்தித்து மொத்தமாய் ஸ்டால் விசிட் செய்யலாம். 

இந்த வருட பர்சேஸ் என்று பார்த்தால் முக்கியமாய் ஒரு Battery Operated Power Sprayer வாங்க ரொம்ப நாள் ஒரு ஆசை இருந்தது. சின்னதாய் Hand Sprayer வைத்து பஞ்சகாவ்யா, வேப்பம்புண்ணாக்கு தெளிப்பதற்குள் போதும் என்றாகி விடுகிறது. மரங்களுக்கு Hand Sprayer வேலைக்காவதில்லை. கொஞ்சம் செலவானாலும் ஒரு Power Sprayer வாங்கலாம் என்று நினைத்திருந்தேன். ஐந்தாறு கடைகளில் நிறைய brand இருந்தது. விலை Rs.2300-ல் இருந்து Rs.4000 வரை வருகிறது. கிட்டதட்ட எல்லாமே சைனா இறக்குமதி பொருட்களை இங்கே அசெம்பிள் செய்து அவர்கள் பிராண்ட் போட்டு விற்கிறார்கள். சிலர் மட்டும் ஆறுமாதம் வாரண்டி என்றார்கள். நிறைய பேர் வாரண்டி எல்லாம் கிடையாது என்று தான் விற்க்கிறார்கள். ஒன்றரை வருடம் பிரச்னை இல்லாமல் பேட்டரி வரும், அதன் பிறகு பேட்டரி மற்ற வேண்டிய வருமாம். அதற்கு Rs.1000 – Rs.1500 ஆகலாம். கொஞ்சம் விலை அதிகம் தான். ஆனாலும் பயன்படும் என்று Rs.2800-ல் ஓன்று வாங்கி விட்டேன். பேட்டரி இல்லாமல் இதே வகையில் Manual Type Rs.700 – Rs.900 க்கு கிடைக்கிறது.

நான் வாங்கிய Sprayer-ல் குறிப்பிட்டு சொல்லும் வசதி என்று சொன்னால் Dual Mode Selection-ஐ சொல்லலாம். ஒரே வேகத்தில் ஸ்ப்ரே செய்ய ஒரு செலக்சன். இன்னொரு Mode-ல் நமக்கு தேவையான அளவுக்கு ஸ்ப்ரேயரில் வேகத்தை வைத்துக் கொள்ளலாம். இது சின்ன செடிகளுக்கு அடிக்கும் போது தேவை படும். நான்கு விதமான Sprayer knob வருகிறது. நம் தேவைக்கு ஏற்ற மாதிரி மாற்றிக் கொள்ளலாம். கொடி, மரங்களுக்கு அடிக்கும் போது நாம் Sprayer-ன் நீளத்தை அதிகப் படுத்தி உயரமான செடிகளுக்கும் அடிக்கலாம். பேட்டரி இருப்பதால் எடை ரொம்பவே அதிகமாக இருக்கிறது. வெறும் இடையே பத்து கிலோ இருக்கும் போல. அதை நீரால் நிரப்பிய பிறகு 15 கிலோ வந்து விடுகிறது. முதுகில் மாட்டிக்கொண்டு தெளிக்க கொஞ்சம் கடினமாக இருக்கிறது.  

Sprayer knobs

Sprayer speed selection control

  

இது தவிர DIP Irrigation ஓன்று செட் பண்ணி பார்க்கலாம் என்று ஒரு ஸ்டாலை பார்த்ததும் விசாரித்தேன். Ebay தளத்தில் 25 செடிகளுக்கு, 50 செடிகளுக்கு என்று செட்டாக கிடைக்கிறது. இவர்கள் செடிகளின் எண்ணிக்கை சொல்லாமல் 50 Sq. Meter (Rs.450), 100 Sq. Meter (Rs.900) ஏரியா அளவுக்கு என்று தனி தனி செட்டாக வைத்திருந்தார்கள். நான் சும்மா முயற்சித்து பார்க்கலாம் என்று 50 Sq. Meter ஓன்று வங்கி வந்தேன். வந்து வீட்டில் பார்த்தால் உள்ளே பாதி பொருட்கள் இல்லை. இவ்வளவுக்கும் நான் அறிவாளி மாதிரி எடுக்கும் போது மேலே இருக்கும் டப்பாவ எடுக்காம அடியில் இருந்த டப்பாவ எடுத்தேன். அப்படி இருந்தும் இப்படி ஆகி போச்சே என்று ஒரே யோசனை. இரண்டு நாள் கழித்து அந்த கம்பெனியில் இருந்து அழைத்து வந்தது. தப்பு நடந்து போனதாகவும், அங்கே இருந்த அனைத்து டப்பாவும் அப்படி இருந்ததாகவும், புதிதாக ஒரு செட் அனுப்புவதாகவும் கூறினார்கள். வந்தால் விவரமாக எழுதுகிறேன். 

இன்னொரு கடையில் நர்சரி ட்ரே ரொம்ப விலை மலிவாக கிடைத்தது. ஒரு தட்டு Rs.15-க்கும் மொத்தமாய் நர்சரிகளுக்கு வாங்கினால் Rs.13-க்கும் தருவதாக கூறினார். நான் ஒரு பத்து தட்டுகள் வாங்கிக் கொண்டேன். விதைகளில் கொஞ்சம் பெரிய வெங்காயம் விதைகள், செர்ரி தக்காளி ஒன்றும் வாங்கினேன்.

 

TNAU ஸ்டாலில் இருந்து சின்ன வெங்காயம், செடி அவரை, கீரை விதைகள் வாங்கினேன். விலையை பத்து ரூபாயில் இருந்து இருபது ரூபாய் ஆக்கி விட்டிருந்தார்கள். ஒரு மாதத்திற்கு முன்பு தான் பஞ்சகாவ்யா வாங்க TNAU போய் இருந்த போது அங்கே உள்ள வெண்டிங் மிஷினில் பத்து ரூபாய் என்று தான் வைத்திருந்தார்கள். மண்புழு உரம் ஆறு ரூபாயில் இருந்து பத்து ரூபாய் ஆக்கி இருக்கிறார்கள். விதைகளை பத்தில் இருந்து இருபதாக்கி இருக்கிறாகள். பஞ்சகாவியா என்பதில் இருந்து நூறு ஆக்கி இருக்கிறாகள். எல்லா இடத்திலும் தோட்டம் பொருட்களின் விலையை கடந்த இரண்டு வருடமாகவே கன்னா பின்னாவென்று ஏற்றுகிறார்கள். அதை பற்றி விவரமாய் பிறகு பேசலாம்.